Friday, July 11, 2014

വിക്സ് മണമുള്ള ഉമ്മകള്‍

ഒരിക്കല്‍ വല്യാപ്പന്റെ
വിക്സ് പുരട്ടിയ
ഉമ്മകിട്ടിയ
അടുത്ത വീട്ടിലെ കുഞ്ഞു കുഞ്ഞമ്മിണിയെ
ചൂണ്ടി വല്യാപ്പച്ചന്‍,
"കൊച്ചിനൊരു പൂവ്
പറിച്ചുകൊടുക്കാടാ",
കൊച്ചു കരയുന്നത് കണ്ടില്ലേ ?
എന്നൊരു ഓര്‍ഡര്‍...
തൊടിയില്‍ നിന്നൊരു പൂവടര്‍ത്തി
ഞാനവള്‍ക്ക് നീട്ടി,
കവിളില്‍ ഒരുമ്മ പുകഞ്ഞു
അവളെ വിക്സ് മണത്തു ..
എത്ര എത്ര പൂവുകള്‍
എന്നിട്ടും അവള്‍
നിര്‍ത്താതെ കരഞ്ഞു...

കുഞ്ചിപ്പട്ടി പോലും
പേടിച്ചോളിച്ച ആ രാത്രിയില്‍
കവിളിലൂടൊഴുകി
ഒരുകടല്‍
ചാണകം മെഴുകിയ തറയില്‍
എന്നെ നോക്കി
പല്ലിളിച്ച രാത്രിയില്‍,
അന്ന് മാത്രം
അമ്മക്ക് ഒരു പൂ പറിച്ചു കൊടുക്കടാ
എന്ന് അനിയനോട് പറയാന്‍ തോനി..
പറഞ്ഞില്ല ,,
മറന്നിട്ടല്ല,
പറഞ്ഞില്ല ....

എത്ര എത്ര വിക്സ് പുരട്ടിയ
ഉമ്മകള്‍ കാലം കവിളില്‍ തരുന്നു,
തൊടിയില്‍ എത്ര എത്ര പൂവുകള്‍
ഇന്നും വിക്സ് മണക്കുന്നു ...

ആത്മഹത്യ ചെയ്ത കൂട്ടുകാരിക്കയച്ച കത്ത് ഇന്നലെ തിരിച്ചു വന്നു, അവനും മരിച്ചുപോയെന്ന്  പറഞ്ഞു പോസ്റ്റ്മാനത് തിരിച്ചു കൊടുത്തു വിട്ടു ...