ക്രിസ്തുതൊട്ട പച്ചവിരല്‍

പുല്‍കൂട്ടില്‍
നിയോണ്‍ ബള്‍ബിന്‍റെ
ചൂടില്‍
വെള്ള പെയിന്റടിച്ച
ക്രിസ്തുദേവന്‍
ചിരിച്ചങ്ങനെ
വിശാലമായി
കിടന്നുറങ്ങുന്നു..

മാറി നില്‍ക്ക് ബ്രോ
എന്ന് പറയും മാതിരി
ഒരു തണുത്ത കാറ്റ്
ഇക്കിളി ഇട്ടു
ചിത്ര പണികള്‍ ചെയ്ത
പള്ളി വാതിലില്‍ തട്ടി
ചമ്മി പണ്ടാരം അടങ്ങി
ഇങ്ങനെ നില്‍ക്കെ ,
ചെരുപ്പുകള്‍ക്ക്
കാവലിരിക്കുന്ന
സി സി ടി വി ക്യാമറയെ
നോക്കി പുണ്യാളന്‍
കുന്തം മുറുക്കെ പിടിച്ചു

വിചിത്ര രൂപമുള്ള
കുറച്ചു ജീവികള്‍
ചുറ്റും എവിടെക്കോ
നോക്കിയിരിക്കുമ്പോള്‍
അടുത്ത് അപ്പന്‍റെ
തോളത്തിരിക്കുന്ന
കുട്ടിയുടെ മുഖത്ത്
മാത്രം
കുഞ്ഞി ക്രിസ്തു ദേവനെ
ഞെക്കി പീച്ചാന്‍ ഭാവം ..
തമ്പായി ആണെന്ന
അമ്മയുടെ താക്കീത്..

ചുവരില്‍ പള്ളി പണിയുടെ
കണക്കു മാല ,
പരസ്പ്പരം
ഇക്കിളി ഇടുന്ന
രണ്ടുപേര്‍
നക്ഷത്രങ്ങള്‍
ബലൂണുകള്‍
ചൈനാ പൂവുകള്‍
മുക്കാല മുക്കാബുലാ ട്യൂണില്‍
ഭക്തി ഗാനങ്ങള്‍
ബ്രോ വിളികള്‍
കുശുമ്പ്
കുന്നായ്മകള്‍
ആകെ മൊത്തം സീന്‍

പാഞ്ഞു പോകുന്ന
കെ എസ് ആര്‍ ടി സി
ബസില്‍ നിന്ന്
കറുത്ത് മെലിഞ്ഞൊരു സ്ത്രീ
ഇറങ്ങി വരുന്ന കണ്ടു
നഗ്നനനായി
ക്രിസ്തു ദേവന്‍,
മുഖത്തൊരു കള്ള ചിരി ..

പണക്കൊഴുപ്പിന്റെ
പള്ളിമേടയില്‍ നിന്ന്
കാലിതൊഴുത്തില്‍ പിറന്നവനെ
കരുണ നിറഞ്ഞവനെ
ഗാനം,
കന്യാമറിയത്തിന്റെ
പച്ച വിരല്‍
തൂങ്ങി
മനുഷ്യാനായി അവനും ......

അപ്പന്‍റെ മീനുകള്‍


തടിപ്പണി കഴിഞ്ഞു
അപ്പന്‍ എട്ടിനെത്തും
കുഞ്ചിപ്പട്ടിയും അപ്പനും
പാടത്തെ
രണ്ടായി പകുത്തു
ചെറിയ റോഡിലൂടെ
കീശ നിറയെ
നിലാവുമായി
കുറെ കവിള്‍
സംസാരിച്ചു വരും

ദിനേശ് ബീഡി
കുത്തി കെടുത്തി
മുഷിഞ്ഞ ഒരു കവര്‍
അമ്മക്ക് കൊടുക്കും
ചെറുക്കന്മാര്‍
എവിടെഡീന്ന് ചോദിക്കും
നിലാവുമായി
അമ്മ
അകത്തേക്ക് പോകും

വെള്ളം ചൂടാക്കാന്‍ പറയും
ഇറയത്തെ കസേരയില്‍
ഒരു ബീഡി
അപ്പനെ വലിച്ചു
ഇങ്ങനെ ഇരിക്കും..

പൂച്ചകള്‍ അപ്പനെ
ഉമ്മവെക്കും..

അനിയന്‍ വരും
അപ്പന്‍റെ തോളില്‍ പിടിക്കും
അപ്പന്‍റെ ഇടത്തെ തോളില്‍ തടി
ചുമന്നു തൊലി
പൊളിഞ്ഞു ഇരിക്കുന്നുണ്ടാകും
അവനതു തൊടും
അവിടുമ്മ വെക്കും
അപ്പനെ നോക്കും
അപ്പന്‍ ചിരിക്കും
അവന്റെ കണ്ണ് നിറയും

രാത്രിയില്‍
ഞങ്ങളപ്പനെ പുതക്കും ...

തിരിഞ്ഞു നോക്കുമ്പോൾ
തോനുന്നു,
അപ്പൻ കുത്തി
കെടുത്തുന്ന
ദിനേശ് ബീഡി
മാത്രമാണ് ജീവിതം ..

അലരിയില്‍
തൂക്കിയിട്ട
എന്റെ കിന്നരങ്ങള്‍
കാറ്റില്‍
പ്രാചീനമായ ഒരു ഗോത്ര ഗാനം
പുറപ്പെടുവിക്കുന്നു ..
ആരോ അത്
ഞാൻ അറിയാത്ത
ഭാഷയിലേക്ക്
വിവർത്തനം
ചെയ്യുന്നു .. 

നഗര കാവല്‍ക്കാര്‍ 
ഉറങ്ങുമ്പോള്‍ 
കൂടാര
കൊടിക്കൂറയില്‍
ഞാന്‍ നിന്നെ 
പച്ച കുത്തുന്നു 

ഞാന്‍ 
ഈ

രാത്രിയാകുന്നു,

നിന്റെ
പേരുചൊല്ലി
വിളിക്കുന്നു ..

 എവിടെയാണ് നീ ???

കാത്തു കാത്തിരുന്ന
എത്ര എത്ര
മയിൽ പീലികൾ
പെറാതെ പോയിരിക്കുന്നു
മയിൽപീലികളെത്ര കള്ളമാണ്

രാത്രിയെ
കള്ളുമണക്കുമ്പോള്‍
നക്ഷത്രങ്ങളെ
ഊതി കെടുത്തി
ഇരുട്ടില്‍
നീ ഇനിയും വരണം

അമ്മ കരയുമ്പോള്‍
സ്വപ്നത്തിലെന്‍റെ
കൈപിടിക്കണം
നിന്റെ
പിന്നിലോളിപ്പിക്കണം....

വിപ്ലവങ്ങളുടെ ദേവത


പ്രിയപ്പെട്ട ഇറോം,
താഴ്വരയില്‍,
തോക്കിന്‍തിരകള്‍
തിന്നാന്‍ വിധിക്കപ്പെട്ട
ആളുകള്‍ക്കിടയില്‍ നിന്ന്‍
നിനക്കെഴുതുന്നു.

അമ്മ,
നിന്‍റെ കഥകള്‍
പറഞ്ഞുതന്നിട്ടുണ്ട്.
അമ്മൂമ്മയായ
ഇറോം ടോന്‍സിജദേവിയുടെ
യുദ്ധകഥകള്‍ കേട്ടിട്ടുണ്ട്.

പതിനാല് കൊല്ലമാകുന്നു
ഏത് ഗോത്ര ദേവതയാണ്
വിശപ്പിനെ സമരമാക്കാന്‍
നിനക്കിത്ര ധൈര്യം തരുന്നത്??

പ്രിയപ്പെട്ട ഇറോം,
ലിംഗം ആയുധമാക്കിയ
ഒരുകൂട്ടം പട്ടാളക്കാര്‍
തീവ്രവാദി എന്ന് വിളിച്ച്
അമ്മയെ പിടിച്ചുകൊണ്ടുപോയി
അയ്യായിരം രൂപയും,
കറിക്കത്തിയും
തെളിവായി കൊണ്ടുപോയി.

അമ്മയുടെ
ജനനേന്ദ്രിയത്തില്‍ നിന്നുമാത്രം
അഞ്ചു വെടിയുണ്ടകള്‍ കിട്ടിയെന്ന്‍
പത്രങ്ങള്‍ പറഞ്ഞു.
ഞാന്‍ കരഞ്ഞിട്ടില്ല...
അമ്മയും.!


ഏതു സമയത്തും
ഞാനും കൊല്ലപ്പെട്ടേക്കാം.
പെണ്ണിന്,
ഉദ്ധരിച്ച ലിംഗവും
ആണിന്,
വെടിയുണ്ടകളുമായി
പട്ടാള വണ്ടികള്‍
പാഞ്ഞുനടക്കുന്നുണ്ട്

കൊല്ലമിതിത്രയാകുന്നു,
ഈ താഴ്വാരം
അതൊരു കോളനി മാത്രമാണ്.

പ്രിയപ്പെട്ട ഇറോം
ചരിത്രം കെട്ടുകഥകള്‍ മെനയുന്നു
ഒരൊറ്റ രാജ്യമെന്നത് എത്ര കള്ളമാണ്.

രാത്രിയില്‍,
കൊളുത്തിയ പന്തവുമായി
തെരുവുകള്‍ തോറും റോന്തു ചുറ്റുന്ന
അമ്മമാരെ ഞാന്‍ കാണാറുണ്ട് ,
ഇരുമ്പ് വിളക്കുകാലിനുനേരെ എറിയാന്‍
കല്ലുമായാണ് ഇപ്പോള്‍ ഉറങ്ങുന്നത്.
എനിക്കറിയാം,
ആ ശബ്ദം കേട്ടാല്‍
അടുത്തെവിടെ നിന്നെങ്കിലും
മെയ്‍‍രാ പെയ്ബീസ് ഓടിയെത്തുമെന്ന്..

ആരാണവര്‍ക്കിത്ര
ധൈര്യം കൊടുക്കുന്നത് ??

പ്രിയപ്പെട്ട ഇറോം , ,
ഒരിക്കല്‍ മക്കള്‍ എന്നോടുചോദിക്കും
വിപ്ലവങ്ങള്‍ക്ക് ഒരു ദൈവമുണ്ടോ??
അവന്‍റെ / അവളുടെ പേരെന്താണെന്ന്??
അന്നവര്‍ക്ക് ഞാന്‍
നിന്‍റെ പേര് പറഞ്ഞുകൊടുക്കും
ഇറോം ചാനു ഷര്‍മ്മിള


പ്രിയപ്പെട്ട ഇറോം,
മാലോമിന്‍റെ തെരുവുകളില്‍
പൂക്കുന്ന ചുവന്ന പൂവുകള്‍ക്ക്
ഞങ്ങള്‍ നിന്‍റെ പേരിടുന്നു...
കൂകി, ചിരു , ചോത്തി
ഗോത്രങ്ങളുടെ യുദ്ധ ദേവതക്കു
നിന്റെ പേരിടുന്നു.
മരിച്ചുകൊണ്ടിരിക്കുന്ന
കാച്ചിന്‍ മഴക്കാടുകളിലെ
മരങ്ങള്‍ക്ക്,
ജീവജാലങ്ങള്‍ക്ക്
പോരാടുന്ന മനുഷ്യര്‍ക്ക്‌,
തടാകത്തിലെ മീനുകള്‍ക്ക്,
നാളെ ജനിക്കാനിരിക്കുന്ന കുട്ടികള്‍ക്ക്,
വരാനിരിക്കുന്ന വിപ്ലവങ്ങള്‍ക്ക്
ഞങ്ങള്‍ നിന്‍റെ പേരിടുന്നു..


പ്രിയപ്പെട്ട ഇറോം ,
ഞാന്‍ നിര്‍ത്തുന്നു.
തീവ്രവാദിയുടെ
കുപ്പായവും തുന്നി
പട്ടാള വണ്ടി
അതാ എത്തിക്കഴിഞ്ഞു...
ഞാനതില്‍, വെടിയുണ്ടകളുടെ
ബട്ടന്‍സുകള്‍ തുന്നട്ടെ...


**************************************************************************************************************
(മെയ്‍‍രാ പെയ്ബീസ് : മണിപ്പൂരില്‍ അക്രമങ്ങള്‍ തടയാന്‍ ശ്രമിക്കുന്ന അമ്മമാരുടെ സംഘം )

നീ ഓർമ്മകളിൽ
മുങ്ങാം കുഴി
ഇടുമ്പോൾ
ഞാൻ
കരക്കിരുന്നെണ്ണുന്ന
കുട്ടിയാകുന്നു..

ഒന്ന്
രണ്ട്
മൂന്ന്...........

ഇന്നിതാ
സ്വപ്നത്തില്‍,
നിന്‍റെ മടിയില്‍ ഞാന്‍
ആകാശത്തേക്ക്
കണ്‍ തുറക്കുന്നു..

നിനക്കായ് ഒളിച്ചു കടത്തിയ
നക്ഷത്രങ്ങളില്‍
അമ്മ മണക്കുന്നു
കൈക്കുള്ളില്‍
നിറയെ
നിനക്കുള്ള
മഞ്ചാടി കുരുക്കള്‍,
അപ്പൂപ്പന്‍ താടികള്‍ ,
മിന്നാ മിനുങ്ങുകള്‍...........

— feeling ചേച്ചി .